Untitled Document

cexicon-3.gif (3202 bytes) 工盟滾熱辣

8月期間公務員工會委員會問卷調查

政府呢幾年都話要縮減公務員人手，究竟而家公務員士氣係點？佢又點睇社會現況？職工盟公務員工會委員會就向各政府部門傳真地址發出問卷做調查，而家正分析緊資料，調查結果喺10月中向外界及公務員事務局公佈。

8月14日職工盟參選立法會誓師大會

二百幾人喺遮打花園又唱又叫搞乜野？原來係職工盟嘅誓師大會，等阿人、阿峰同阿九(蔡耀昌)可以展現一下進入立法會嘅決心。不過個天唔知係唔係想考驗吓佢地，大會開始前突然落一場大雨，大家避雨都差啲避唔切。好在喺阿人帶頭撐撐撐下終於撐停場雨，大會可以順利舉行。點解爭取打工仔女權益嘅路上，硬係有咁多風風雨雨嘅呢？
　

9月12日立法會選舉

終於到咗決戰日子！選舉當日，職工盟動員咗超過四百人參與街頭宣傳、電話動員等嘅助選工作。皇天不負有心人，阿人最後喺新界西區獲選，而獨立參選嘅職工盟會長阿石亦在九龍西區當選。大家當日又有無投佢地一票呀？

9月24日要求社署制定監管機制

社署由今年4月1日起，改用撥款方式要社福機構自己幫員工買勞保。職工盟資助機構工會(社會服務)委員會知道社福界工傷數字比10年前上升咗3倍，社署監管不足，自然係罪魁禍首啦！而家員工做得咁辛苦，好容易工傷，社署仲要行新措施，機構分分鐘搏矇隱瞞工傷，所以委員會就要求社署快啲制定監管機制，咁先可以保障社福界員工嘛！

9月25日非全職工人勞工法例保障研討會

為咗瞭解外國如何保障非全職工人，職工盟搵咗社會經濟研究所進行研究，最近研究報告完成咗，當然要第一時間向大家發表，順便傾吓香港可以點樣借鏡啦！所謂「一人計短，二人計長」，何況今次仲有40幾名屬會代表呢？各代表好快就各行業現況討論出具體的爭取目標，跟住就要睇吓點樣落實計劃喇！

9月27日及10月1日反削綜緩抗議行動及集會

政府無良？當然，如果唔係就唔會喺通脹再現後，仍堅持喺國慶日再次削減綜援金啦！幾十個民間團體先喺9月27日到社署及政府總部抗議，10月1日再喺遮打花園開記招，都係希望政府可以停削綜援，亦檢討香港的社會保障制度。睇見班公公婆婆同傷健人士咁辛苦都去抗議請願，好心政府就真係順應吓民意，唔好再堅持削綜援咁無良啦！