雙糧花紅大作戰!

「年尾想轉工,又想拎Bonus, 點做最好?」

準備過年la,做得開心既朋友當然繼續做啦,但做得唔開心嘅,都應該想跳糟轉工。啲人成日死忍爛忍,話要忍到年尾出Bonus先走,到底點先知今年有無Bonus? 想年尾拎埋錢就Quit,點做才不失霸氣?

 

首先,你要知道自己果份年尾花紅係咪屬於酌情發放(即係俾又得唔俾又得!)。

《僱傭條例》及過去法庭案例話比我地知,如果書面合約話你享有年終酬金,不論名稱係雙糧、第十三個月糧、花紅或者什麼名目都好,而合約亦無寫明有酌情條款嘅話,基本上係必須發放,不論今年公司係賺與蝕,老闆心情好定唔好,公司都有責任要支付年終酬金俾大家。

不過,大家要注意,即使無書面合約,口頭承諾或過往慣例,亦可構成僱傭合約一部份。反之,如果係有寫明酌情發放或償贈性質,例如「視乎經營情況而決定發放與否」及「僱主有最終酌情權」呢類字眼,嚴格來說並不代表你每年年尾奉旨都攞到。

 

至於做得好唔開心,想Quit又想拎埋份年終酬金,點算好?

講明先,酬金期內自己辭職,係乜都無得拎架!因為《僱傭條例》規定,如果份合約係由僱員主動終止,喺酬金期內自己唔撈,就唔可以取得該年度年終酬金;不過,如果員工離職時,實際已經完成咗酬金期,只係未到支付日期,則仍然可追番自己應得果份年終酬金。

但如果員工係因被解僱而離職既話,咁又唔同講法。員工被老闆以通知期或代通知金嘅方式終止合約,而員工已經做滿酬金期三個月或以上(唔計首三個月試用期),則僱主則仍然需要按比例發放該項年終酬金。

 

咁老闆如果屈人犯錯而亂咁炒人魷魚,個員工仲有無得攞呢?

年尾亂炒人,亂出警告信我地都接過唔少單CASE,因為僱主如果引用《僱傭條例》第9條,因員工犯嚴重過錯而即時解僱嘅話,員工真係會喪失拎年終酬金嘅資格。但係,俾人屈係有得搞嘅!只要員工能夠在法庭證明自己無犯上面所指既過失,而本身合約又講明有年終酬金的話,僱主就需要俾返啲錢你。

如果大家對年尾花紅、雙糧仲有咩唔明,或者需要求助,就隨時打黎我地嘅權益熱線 27708668 啦!

最後,講咗咁多,如果你份工係好似筆者咁,從來都無講過年尾有花紅或雙糧,呢度其實無你嘅事,不如你返出去做野先啦(哭)。